Google Business Profile banana free hai, aur ise aap khud 30-40 minute mein bana sakte ho. Business.google.com kholiye, apne Gmail se login kijiye, dukaan ka naam, category, address ya service area aur phone number daaliye, phir Google jo tareeka de us se verify kijiye. Verify hote hi aapki dukaan Google Search aur Maps pe dikhne lagti hai. Neeche har step aasaan bhasha mein hai, aur wo teen galtiyan bhi jinki wajah se listing suspend ho jaati hai.

Shuru karne se pehle: kya listing pehle se bani hai?

Google pe apni dukaan ka naam aur ilaaka search kijiye. Kai baar listing pehle se bani hoti hai. Kisi customer ne joda hoga, ya Google ne khud bana di hogi.

  • Listing mil gayi: nayi mat banaiye. Usi pe "Own this business?" ya "Claim this business" dabaiye aur use apna bana lijiye.
  • Nahi mili: tab nayi banaiye.

Ek hi dukaan ki do listing ho jaayein to Google dono ko kamzor maanta hai, aur customer bhi confuse hota hai.

Step 1: Sahi Gmail se shuruaat

Business.google.com kholiye aur us Gmail se login kijiye jise aap hamesha chalaoge. Listing ka maalik yahi account hoga.

Is account ka password kisi ko mat dijiye, agency ko bhi nahi. Kisi ko kaam karwana ho to Google ke "People and access" se use manager bana dijiye. Listing hamesha aapki rahegi, aur access jab chaho hata sakte ho.

Step 2: Business ka naam

Yahan wahi naam likhiye jo aapki dukaan ke board pe likha hai. Na kuch zyada, na kuch kam.

Bahut log naam mein "Best", "No. 1" ya shehar ka naam jod dete hain, taaki search mein upar aayein. Ye Google ke niyam ke khilaaf hai, aur isse listing suspend ho sakti hai. Agar aap chahte ho ki naam mein kaam ka shabd ho, jaise Embroidery ya Sweets, to pehle board aur visiting card pe bhi wahi naam karwaiye.

Step 3: Category, sabse zaroori step

Category se Google tay karta hai ki aapki dukaan kis search mein dikhegi. Galat category matlab aap sahi customer ko dikhoge hi nahi.

  • Category ke box mein do-teen alag shabd daal ke dekhiye. Sahi category aksar pehle suggestion se zyada specific hoti hai.
  • Ek primary category hoti hai, jo sabse zaroori hai. Baaki additional categories sirf wo daaliye jo kaam aap sach mein karte ho.

Ek embroidery unit ki listing pe category "Joiner" thi, yaani lakdi ka kaam. Category "Embroidery service" karte hi teen ghante mein Google ne use sahi dikhana shuru kar diya. Poori kahani yahan padhiye.

Step 4: Address ya service area

Agar aapki dukaan hai jahan customer aata hai, to poora address daaliye aur map pe pin bilkul sahi jagah rakhiye. Pin galat hua to customer galat gali mein pahunchega.

Agar aap customer ke ghar jaake kaam karte ho, jaise plumber, AC repair, tuition ya beautician, to address chhupa ke service area daaliye. Service area mein wahi ilaake likhiye jahan aap sach mein jaate ho. Bahut bada area likh dene se ranking nahi badhti.

Step 5: Phone, WhatsApp aur website

  • Phone number wahi daaliye jo aap khud uthate ho. Google pe Call button isi number pe jaata hai.
  • WhatsApp chalta ho to WhatsApp chat ka option bhi jodiye. Aajkal kai customer call ki jagah message karte hain.
  • Website ho to uska link, aur Instagram ya Facebook page ho to social profiles mein jodiye.

Number baad mein badalna pade to Google use review karta hai, aur isme 48 ghante tak lag sakte hain. Is beech baar-baar edit mat kijiye. Iske baare mein phone number wala guide padhiye.

Step 6: Verification

Google ko yakeen dilana hota hai ki ye business sach mein aapka hai. Google jo tareeka de, wahi apnaiye. Ye phone, SMS, email, postcard ya video ho sakta hai. Aajkal zyadatar video maanga jaata hai.

Video ke liye ye dhyan rakhiye:

  • Ek hi baar mein, bina cut kiye record kijiye.
  • Bahar se dukaan ka board, gali ka naam ya koi landmark dikhaiye.
  • Apni chaabi se dukaan kholiye aur andar aaiye.
  • Andar ka kaam aur saamaan dikhaiye.
  • Koi business document dikhaiye, jaise GST ya Udyam certificate, ya bijli ka bill.

Aur verification ka code kabhi kisi ko mat bataiye. Google kabhi call karke code nahi maangta. Aisi calls ke baare mein humne scam calls pe alag se likha hai.

Step 7: Listing poori kijiye

Verify hote hi listing ko poora kijiye. Adhoori listing ko Google kam dikhata hai.

  • Photos: teen tarah ki photo daaliye: bahar se dukaan, andar ka mahaul, aur aapka kaam ya saamaan. Internet se uthayi photo mat daaliye, asli photo hi daaliye. Har mahine 2-3 nayi photo jodte rahiye.
  • Timing: bilkul sahi rakhiye. Navratri aur Diwali jaise tyoharon pe "Special hours" alag se daaliye.
  • Description: 750 akshar mein likhiye ki aap kya kaam karte ho, kis ilaake mein ho, aur kab se.
  • Services ya products: jo kaam karte ho, alag-alag likh dijiye.

3 galtiyan jo sabse zyada hoti hain

  1. Naam mein keyword bharna. "Best Sweets Shop Karol Bagh No.1" jaisa naam listing suspend karwa sakta hai.
  2. Galat ya bahut aam category. Aap sahi search mein dikhte hi nahi, aur pata bhi nahi chalta kyun.
  3. Baar-baar edit karna, ya kisi ko verification code bata dena. Pehle se review ruk jaata hai, doosre se listing hi haath se nikal jaati hai.

Aksar pooche jaane wale sawaal

Google Business Profile banane ka kitna kharcha hai?

Kuch nahi. Banana, verify karna aur chalana, sab free hai.

Ghar se kaam karta hoon, kya listing ban sakti hai?

Haan. Address chhupa ke service area wali listing banaiye.

Verification mein kitna time lagta hai?

Tareeke pe depend karta hai. Video ka review aam taur pe kuch dinon mein hota hai, postcard aane mein do hafte tak lag sakte hain.

Listing banne ke baad turant upar aa jaungi?

Nahi. Google category, doori, reviews aur listing kitni poori hai, ye sab dekhta hai. Listing poori rakhiye aur har khush customer se review maangiye.

Khud nahi ho raha?

Listing bana li par kuch galat lag raha hai, ya verification atak gaya hai? Hum free mein check karke batate hain ki kya galat hai. Listing theek karne ka ek baar ka kharcha ₹1,000 hai, aur Delhi mein hamara local SEO ka kaam yahan dekh sakte hain. WhatsApp pe business ka naam bhejiye.