Google Business Profile mein ek primary category hoti hai aur 9 tak additional categories. Primary category wo chuniye jo aapka sabse bada kaam hai, aur jitni specific ho sake utni. Additional mein sirf wahi kaam daaliye jo aap sach mein karte ho. Category se hi Google tay karta hai ki aapki dukaan kis search mein dikhegi, isliye listing ka ye sabse zaroori box hai.

Category itni zaroori kyun hai

Koi "embroidery work near me" ya "mithai ki dukaan" search karta hai, to Google sabse pehle dekhta hai ki kis listing ki category us search se match karti hai. Naam, photos aur reviews baad mein aate hain.

Category galat hai to aap sahi customer ko dikhoge hi nahi, chahe aapke 200 reviews hon. Aur aapko pata bhi nahi chalega kyun, kyunki listing to "theek" dikh rahi hoti hai.

Delhi ki listings check karte hue humein ye galti sabse zyada dikhti hai. Haal hi mein ek mithai ki dukaan ki listing dekhi jo saath mein pav bhaji bhi bechti hai. Uski primary category "Restaurant" thi. Matlab Diwali pe "sweet shop near me" search karne wale ko wo dukaan ya to dikhegi hi nahi, ya bahut neeche dikhegi.

Primary aur additional category mein fark

Primary category aapka asli kaam batati hai. Ranking pe iska asar sabse zyada hota hai. Isi se listing mein kuch features bhi khulte hain, jaise restaurant ko Menu ka option, salon ko booking ka option, aur services ki list bhi isi ke hisaab se aati hai. Primary sirf ek hoti hai.

Additional categories aapke baaki kaam batati hain. Ye 9 tak ho sakti hain. Inse aap un searches mein bhi aa sakte ho jo aapke main kaam se thodi alag hain.

Upar wali mithai ki dukaan ke liye sahi tareeka ye hota:

  • Primary: Sweet shop (ya Indian sweets shop)
  • Additional: Restaurant, Fast food restaurant

Kaam wahi hai, bas order badla. Aur fark bahut bada hai.

Sahi category kaise dhoondhein

  1. Apna kaam ek line mein likhiye. "Main computerised embroidery karta hoon." "Main ladies suit silwata aur bechta hoon." Jo pehla kaam bola, wahi primary hai.
  2. Category box mein English mein 2-3 alag shabd daal ke dekhiye. Google ki categories ki ek fixed list hai, apni taraf se nayi nahi bana sakte. "Embroidery" likhoge to "Embroidery service" aayegi, "Embroidery shop" bhi aa sakti hai. Pehla suggestion hamesha sahi nahi hota.
  3. Sabse specific wali chuniye. "Shop" ya "Store" jaisi aam category se kuch nahi hota. "Women's clothing store" ya "Boutique" behtar hai, "Mobile phone repair shop" "Electronics store" se behtar hai.
  4. Competitor dekhiye. Google Maps pe apne ilaake mein wahi kaam search kijiye. Upar aane wali dukaanon ke naam ke neeche unki primary category likhi hoti hai. Isse andaza ho jaata hai ki Google is kaam ko kis category mein rakhta hai. Bas aankh band karke copy mat kijiye, wahi chuniye jo aapka kaam hai.

Kuch aam dukaanon ke liye examples

  • Mithai ki dukaan: Sweet shop ya Indian sweets shop
  • Boutique ya suit ki dukaan: Boutique, Women's clothing store
  • Beauty parlour: Beauty parlour (sirf baal ka kaam ho to Hair salon)
  • Mobile repair: Mobile phone repair shop
  • Coaching ya tuition: Coaching center, Tutoring service
  • Dentist: Dentist ya Dental clinic
  • Embroidery ka kaam: Embroidery service

Ye sirf shuruaat hai. Aapke kaam ke hisaab se aur bhi behtar option ho sakta hai, isliye step 2 zaroor kijiye.

Category kaise badlein

  1. Google pe apne business ka naam search kijiye (usi Gmail se login rehte hue jisse listing bani hai), ya business.google.com kholiye.
  2. Edit profile dabaiye, phir Business information mein Business category.
  3. Primary category badliye, additional jodiye ya hataiye, aur Save kijiye.

Badlav ke baad Google use check karta hai. Kabhi kuch ghante lagte hain, kabhi 2-3 din. Is beech baar-baar edit mat kijiye, warna review dobara shuru ho jaata hai. Ye wahi niyam hai jo phone number badalne pe lagta hai.

Ek asli kahani: lakdi ka kaam ya kadhai?

Ghaziabad ki ek embroidery unit ki listing pe category "Joiner" thi, yaani lakdi ka kaam karne wala. Saalon se kadhai ka kaam ho raha tha, par Google unhe carpenter samajh raha tha. Humne primary category "Embroidery service" ki, aur lagbhag teen ghante mein Google ne listing ko sahi search mein dikhana shuru kar diya. Poori kahani yahan padhiye.

4 galtiyan jo mat kijiye

  1. Jo kaam nahi karte, wo category daal dena. Zyada categories se ranking nahi badhti. Ulta Google ko samajh nahi aata ki aap asal mein kya ho.
  2. Aam category chun lena. "Shop", "Store" ya "Service" jaisi category se aap har jagah thoda-thoda aur kahin bhi upar nahi dikhte.
  3. Competitor ki category bina soche copy karna. Unka kaam aapse alag ho sakta hai.
  4. Har hafte category badalna. Har badlav pe review hota hai, aur baar-baar badlav listing ko kamzor dikhata hai.

Aksar pooche jaane wale sawaal

Kitni categories daal sakte hain?

Ek primary aur 9 additional, yaani kul 10. Par 10 bharna zaroori nahi hai. 2-4 sahi categories, 10 aadhi-galat categories se behtar hain.

Mera kaam list mein hai hi nahi, kya karun?

Sabse nazdeeki category chuniye. Phir apna asli kaam listing ke description aur services mein saaf shabdon mein likhiye.

Category badalne se ranking turant badal jaati hai?

Kabhi kuch ghanton mein, kabhi kuch dinon mein. Upar wali embroidery unit mein teen ghante lage the. Par category sahi ho jaane ke baad bhi reviews, photos aur poori jaankari ka kaam chalta rehta hai.

Category badalne se listing dobara verify karni padegi?

Aam taur pe nahi, par kabhi-kabhi Google dobara verification maang sakta hai. Isliye category soch samajh ke ek baar mein badliye.

Nayi listing bana rahe ho to pehle ye guide padhiye: Google Business Profile kaise banaye.

Khud nahi ho raha?

Pata nahi chal raha ki aapki dukaan ke liye kaunsi category sahi hai? Business ka naam bhejiye, hum free mein check karke batate hain ki category aur listing mein kya galat hai. Theek karne ka ek baar ka kharcha ₹1,000 hai, aur Delhi mein hamara local SEO ka kaam yahan dekh sakte hain. WhatsApp pe business ka naam bhejiye.